قسم سافرت فيك
سافرت فيك
تاريخ الإضافة: 15/07/2007 رشح | إهداء

سافرت فيك
سافرت فيك قبل الزمن يطبع ملامحو عليك اسى
سافرت فيك قبل الهواجس والظنون
قبل الهوامش تعتريك
سافرت فيك
قبل الغيوم تحتل تغازل وجنتيك
وقبل اى شى
رددت فى سرك غناى
وعشمت كان القى الحزن
ودع مطاراتك رحل
او ارتحل
او رتب مطارات الاسى
او رسبا
وحلمت بيك مرسومة فى خط التارجح
بين كونك تكوننى واكونك
انسان مقيد بى هواك
بين كونك
حقيقة او خيال
شل تفكيرى وسرح
وصرخت فيك يابت مجرتقة بالحزن 
بتقيفى وين
ضاق التارجح من عزابات سكتك
مليت سهادى فى حضرتك
يامارقة من زحمة دخول الشوق على
حيلك على الصبر النفد قبل المواويل تتحكى
مطرك يعاود دون خريف
جرحك بتاور فى الشتاء
يابت معمعمة بالظنون
بتظنى ليه
مالدنيا كلها
ظنتك انك انا
وانا مندهش سرحان الملم فى الهموم
دستيو فى بطن الشمس لون وجنتيك
واستمتعو الناس بى وراى وقت الاصيل
ووقت الاصيل فتشت فيك وين وجنتيك
ما اتلخبطن
لا قدرت افرز بين اصيلك والاصيل
ما الدنيا كلها اتصلت
وغرقت فى لون الشفق قبال اصل نقطة تماس
مماسة لى لون الشفق
اتشبست بى ابنوس عينيك
ولميت عقاب ريدى وبقيت مستنى منك شهقتك
مالانتظار قدر الرحيل
 لى سكة مابتعرف رجوع



ايام مضت

لا بد تعود ايام مضت
تسكت جرح كل السنين الضائعات
وينداح وتر يكتم نفس شعر الغنا
ويرجع قلب شال الهموم فى عز ضهر
وفى ليل ضلام غربة وسفر
ويمسح خيوط المستحيل البرقن
ويكتم حنان جوا الحشا
مكدود اسى
وضائع وحيد فى نار تولع للابد
لاموية فى لا ضو يجى
ونقسم يمين انوالامل المرتجى
المنتعش فى كل صبابات العنا
بدا يزدهر جوا القلوب
وفى عز ضلام ما خشى ضو
نركب مراكبك ياقدر
ونسبح نعوم فى كوم هموم
لمان شمس باكر تجيك
نلقاك فى دنيا العيون
شايل ظنون
والموجة فى الجرح القديم 
تبكى وتنقط
وتكتم على كلو شيى
نفسو البصعد ويتكى
وتكتب موت الفجاءة
لى كل زول كان قاعد يقول
احسن لى موت
ويصمت كل الكلام الجوا فى نبض العرق
وترجع قوانين الزمن
زى يوم يكون الجو سخن
لاموية فى ولا ضو يجى
نحلم اكيد بى ضو انيق
يملا الارض كمين عدل
ويكتب على زمن الظلم
لحظات وداع
ونركب سفن فى لجة روحها محرقة
وكتين تشوف الناس تجى
تقعد تعاين فى العيون بى كل اسى
 ويرجع شفق غير مواعيد الزمن فى سكتو
ودس الزمن فى كل مكامن روعتو
وخلف وراهو شوق مضمحل
وغير سهاد الليل هجود
ودوزن ارق كل المساهرين التعابى
حلم جميل
ويكتين يشوفو الضو فى سرابيل المسافة
الممزوجة بى كل الحكايات القديمة
والحروف الابجدية الضايعة فى نص الكتابة
وفى مطارات الحصص
وفى مواقف كل سؤال دار فى خيالك
وفى الرموز المخملية والعيون السرمدية
والاحاجى المستمدة
من تباريح الحكاوى
العابرة فى مكمن هواك
المستحى



اتسربينى



اتسربينى واملينى بيك
لامن افيض منك شزا
وتموت كل الغناوى السارقة ليك اصياف حزن
اتسربينى ومسحى كل المسامات بى هواك
واملينى ريد
واتشربك يا حلوة زى وجعى المكتف بى هواك
زى طول ليالينى البتلهث فى رجاك
وما كنت قايل بى وراك
القاك معاى
تنغض مواعيدك مناى
وتظل تشخبط فى جواى
اعمق سؤال
فرز براك
مابين خلودى وبين بقاك
وانا لا بفرز بين عيونك والنبال
بين بزوغك والافول
لا بميزبين ملامح ضحكتك واصوات اناى
واقعد براى احصن اساى
وافتح توابيت سكتك
وارجى الرجوع
ارجى التوافد من خلالك
صفحة رضا
عنوان امل
متكول يعاين بى حزر
مستنى منك صوت غناك
تعبك بيفتر من ملاحقتك وراك
حزنك حزن من طول وقوفو على الرصيف
فرحك وصل حد الغياب
ليلك مضلم من بعد شوقى
المهاجر فى دناك
ضجرك مكدر نوم عينيك
كابوس معتر لى لقاك
ويصحى الصبح
يصحى الصبح من غير ميعاد
خم الكوابيس البتنحر فى قواك
وضحكتى لامن دمع سماك
واهداكى من تالاهو غيم
غسلتى بيهو مرض سنين
احساسك النايم معاك مابشبهك
زمنك بغالط فى خطاك
دربك ودر من طول مشيك
وشهقتى بى حكم القدر
خرجتى كيمان من ضجر
ومرق معاك صوتك ابح
واتاوه الجو بى حداك
ملت شوارعك من عناك
احلامك الماتت معاك
سمعت نفخ صورك صحت
غطت مساحات الارض
واتهوززت اوتار غناك
كل الارض شربت غنا
وكل الارض رويت غنا
وكل الارض فاضت غنا
وضل الطريق الاكتأب


تقديم
الى التى ينبقى لها ان تتنفس كما تشاء
الى التى رفع عنها حد القتل الخطأ

نص
ومين الاداكى الازن
تخترقى كل الارصفة
وتجتاحى كل المكنة وتدخلى من غير اهتمام
ومين اللخصاك بالازن
وهيج فنون الخوف جواى
ولية التفانى الفى ملامحك والتوانى الفى رؤاك
ومين الاسس فى جواك فكرة وجودك دون قيود
اداكى حق الجتباح ومنعنى منحق الصمود
سواكى من دون احتراس
وتكتلى بى كل احتقار وتفوتى من دون اعتزار
وان بندهك فى السكة كمين من قتيل
واستوقفك لحظة خروجك
من فضاءات العدم
عينيك صنفين من عزاب
وصوتك بيمرق والفراق مليان فتر
فتر جواى الانتباه
كتر معاى الانشداه
حاورنى صمتك بازدراء
وانا ياعيون
نعس قواديسى الزهول
ضجرمواعيدى القلق
سمر وقوفى الانتظار
احرج لسانى الاندهاش
وقدرت عينيك تسرق من الموية الصفا
وتلفح من النوم النعاس
وبراءة الاطفال
قدرت تخم كل الصفات
الا السهاد خلنو لى
وانا
انا قبل افكر انى اجيك
القانى ضليت الطريق
والقانى مليت العلاقة البينى بين ظنى وانا
مافى المسافة البينى بينك والشكوك
اتضايرت اسراب قوافل من فرح
وشعوب قلوب اتيتمت  
والقانى قارنت بين زحمة مفاتنك وانحناءات القدر
مابين نضارتكوانحسارت الزمن
مايزت بين دهشة عيونك
ورعشة الشوق الرهيف
أه ياعيون
مرات شموس
مرات فلم
مرات تواريخ الامم
مرات شوارع محتشدة بالناس العزاز
مرات قمم
والقاهن معارك بالرماح ومرات سهم
واوقات مسارح مليانة بالطرب الاصيل
واوقات حزن
أه يا كهارب وياضجيج
ويامنارتين للعناد
الاولة بترتب مواطن الخوف جواى
والتانية بتلخبط بلاد
عينيك شعاع يقلب ضلام الليل صباح
عينيك رضا وعينيك سكون
عينيك سماح
ياطالعة فى الزمن المباح
يامانعة للفرح البسيط
يا واهبة لى كل الجراح
يا باشة من دون انشراح
يا صاحة فى الزمن الغلط
صحينى منى عشان اجيك
دسينى منى عشان افيق
عبينى ضدى عشان افك
كل الطلاسم والقيود
وينبض الشوق المخزن فى الخيال
والقانى بيك انسان مثال
انسان خلوق
عشق الخيالات البعيدة وادمنا
وانسان ملانبك بالعشق لا عند هنا
ساوم بحبك كل شى
واتمنى لو القاكى فى
القاكى واضحة كما الشمس
ويرتاح على انسام هواك
لو كان همس

عايش براى

عايش براى فى جو معطر بالخيال
فى ليل ثوانيهو اتمددت
صبحا يفر ما يتلقى
ليلا طويل ومسافتو تب مابتنتهى
دشنت فى جواى تسابات العمر
القاهو مستنينى بى ضحكة هزار
يا ليل كفاك افسح مجالك للصبح
وانا لسه بتزكر مفاتن بسمتك 
وبكتين يردد فى حشاى الانكماش
وكتين عويناتك تطش منى وتجى
وكتين مشيت شلتك جواى
وبسال عليك
بسال عليك لامن وصلت الندهاش
واناماشى فى نص الطريق
اسمع تفاصيل وشك المدسوس ينقرط بى خجل
فى الساعة ديك امر القلب بى دقتين
يجب الوقوف
والدنيا فى فاصل ضلام
قرب يعود الليل خلاص
ما الليل مصيبة الانثوات
وكل القطارات التعدى على مطارات
خصرك التايه مابين صدودك والرضا
مابين قوامك والنزوح فى فلسفة جور الزمان
كان الحزن فى اللحظة ديك راسم هلال
شايل خطاويك بى ارتهال
راميها فى صفحة تضاريس العزاب
ما كم فرح جا وما انتظر
ما كم قلب واعدنى بى لحظة حنانو وما وفى
وانا مالى كل ماشفت قلبى الفى جواك اندافقت فينى الهموم
واستحلفت بى كل حبة من المحبة الانتظار
ورمشة ثوانى الانعطاف مابين هواك
ورشة بتبشر بالخريف
ياريتنى لو اقدر اقيف
او القى لحظة انغماس
فى نفسك الجواى سنين
وانا لسه تايه فى جواى
لاقدرت احصل زاتى
شان القك هناك
لا قدرت ارجع لى مكان زاتى الزمان
اخر المطاف بعد التعب والدردرة
لامن وصلت هناك لقيت
لازاتى لازاتك هناك


تقديم

كلما استحالت المسافات بيننا الا ما لانهايه 
تلوح بعض الخيوط فى الافق
ولكن عندما تستحيل الخيوط نفسها التمدد
اجدنى منكمشا فى زنزانة مساحتها
مليون نيل ممدد


نص


شديت وتر كل القصايد خيل
والبشاشات المارقة منك اندهاش
سميت وصول كل الغمامت ليل
وعديت حضورك امتزاج اللوحة فى اللون الشفبف
يا زى نشوق الروح وتمثال الوله احساس
يا زى نضارة شوف وزوق وافصاح
يامن مسارب الروح مدارج الخوف
لميت تفاصيلك منى واخلاص
وسويت الزمن شاهد على الحساس
ضامر فراقك زيف
نازف رحيلك بوح
شارب ملامحك صوت
وكما الاشراق اناجيكى
اعاين فى حضاراتى واغنيكى
وتر مشدوه وتايه بين مروق الروح وعينيكى
وصوت اطفال على القمرة بنادوكى
الليل وكر الشمس
ولامن تحس وبراها بى ضيق الوكت
تندسه فيو
والقمرة حوريه بتغازل فى الوكر ومرات تطش
والغيم ختر فى رحلة بتنزه على ضهر البحر
والصوت جهر لامس مأزنك وهامسا
وفجأة من دون احتراس ضاعت ملامحك باعتنا
زابت محاسنك فينى انا
وفجأتين
كنتك انا
وانا ياسلام
كل المواسم اخضرار
وانا يا سلام كل المواعيد ازدحام
وانا ما ملام
بين اشتباهك والغرام
بين انتقائك واحتمالات الصدف
بين اجتماعك فينى يوميا ارق
بين ازديادك
فيني انهار من الق
وانا يا وعود دوزنت احلامك رؤى
خمنت اطيافك رضا
شبهت امالى المغلفة احتمال
وانا بى وله ضايع نحيل
كلك محطات انتظار
كلك مناجات اجترار الزكرة والزمن الجميل
كلك نقاء الزات وترويض الضمير
كلك شموخ
وانا من معاناة الوصول
بتخيل احساسك
خيوط
واتسلقك ..... اتسلقك ...
اتسلقك حد امتدادات الخيال
حد انتها الوقت حد الاستوا
حد اختفاء الحزن حد الانطباع
اتسلقك حتى النخاع
واستدعى كل الانفعالات انتظام قدر الهطول
واوصل اليك
مستبيح كل الاماكن انكماش
كل الهواجس انصراف
واستميحك انسجام
نتلاقى مشوارين عنا
نتناجى ليلين ابتهاج
نتبخر الوان من فرح
ونتسامى فى كل الجهات

مرثية صديقى العزيز محمد عبد الوهاب 
توضيح
(محمد عبد الوهاب هو صديقى وزميل دراسة توفى فى حادث حركة اليم  فى طريق الخرطوم -مدنى
فى رابع ايام عيد الاضحى وكان وقتها يقضى فترة التدريب فى المصنع الماليزى السودانى )
تقديم

فى عيد ما .........من اعياد هزه المدينة المجنونة
فى طريق لا يسمح بمرور المركبات على ظهره
الا بعد ان تدلك اطاراتها بالزيت 
كانت هزه المأساة .....
الى صديق المنافى والنور
الى زاكرة الالم والشوق
الى صديق بعيد فى اقصى احتمالات الحياة
مدخل
ما بين ماليزيا والسودان
اتفاق صريح لحزن طويل
اتفاق اثيم لحزن اليم
اكتأب ممل لحزن مستمر
انطفاء لدواخل النفس وغياب للضمير
سكوت لحواس الناس وصراخ للروح
ما بينهم ايقاف لايدولوجيا الشهيق
واعتصار للالم
انصهار لسلوك الانسان فى تراجيديا الرحيل المر
انعدام للحياة
وابتداء للعدم
مابينهم وله قديم واستدراج للموت العنيد
مقطع

ومابيننا قبال نلاقيك نفقدك
قبال نحلق فى عناوينك نطوف نستنشقك
قبال نحبك نعشك
قبال مسارح النور ترحب بى حبور تستقبلك
ما بينا اكبر من ولوج الروح داخل مسامات جتتك
اكبر من ملامح الخوف وشاهق عفتك
اطهر من مسابح القوم
ولا ميعاد ولا احساس
ولا اخبار
تفوت وكانو فى نيتك رجوع مجزم
وفى شفتيك سؤال مبهم
وفى عينيك طفولة حس
وفى ايدك قلم مندس
تشخبط فى دفاترنا حزن ممتد
قبل نبداك نشف باقى الكلام المر
على حلوقنا
واصوات الحنين شربت سواد لونا
تفوت قبل الطيور تنضم
تفوت قبل الديوك تصدر مواعيدها
وما لاقيت قمر بيطلع بلا ميعاد
وشمس تغرب بلا حولا
ولا زولا بيعبر فى المدى و ولهان
ويتخطى عوالم الشوف بلا ادراك
تفتفت فى حصون الارض عشان تدخل مساماتا
بتسكن فى بواطن الارض عشان ضاقت مساحاتا
تخلينا نكابد بعدك الحرمان
ونتغيأ مزاحم الهم
ونتصارع مع الغابة
بدون حلمك
ونتغازل بلا احساس
ونستدعى كؤوس النوم
تطل فى عيونا حنيتك
يا طيب الروح يا حنين
يا زول مسالم ياأمين
يا سالم الزوق يا نبيل
تفوت قبل تكمل مشاويرك
تروح قبل تطمس عوامل الجو تصاويرك
بلا توقيع ولا امضاء
على دفتر حزن ممتد
وتبدأ تهد فرح كل المواسم هد
تلخبط فينا ترتيب السنين وتفوت
با اخبار بلا ميعاد بلا اخطار
تفوت باسراع متل جيتك
لكن وحاتك ما براك
ولا طبعك تفوت وتروح بلا اسباب
ولا عهدك تخلف الوعد
ولازمنك بغالط فى خطاك محتج
سياسة البوت
مساوى البوق
لغة التماسيح العجم
مساخيط الضلام والهم
غزارات السجم والخم
بشارات الفقر والغم
بدل ما توسع الشارع
بتبلعو جم
عفاريت الضلام والزل
نتائج لى قدر ساخر
وسائل لى غبن شامل
مشانق لى نقاء الروح
موانع لى ظهور الحق
وشن فاضل بعد فوتك بلا الخطب الهلاميه
بلا التصريح وكمين كلمه مرمية
على هامش جدار الصمت
بلا الحزن الطويل ممتد
بلا الخوف الملا عروقنا
بلا الصوت البلاوى على المدى ويصمت
ويغير وضعو بى زحمة سكات وملل
بلا الآهات قصر اليد
نم يا عزيزى دون اسألة ورد
نم
دون ارهاق وجهد
نم دون نكد
يا غزاء الروح يا ملح الجسد
يا مزيدا من حضور
يا امتزاجا من تساريب الوله
يا اشتهاء الارض
يا قدر السماء
يا ربيع العمر يا صيف الحياة
نم يا عزيزى طالما
عشقك كريات دمنا
ما طالما نبضك دقائق عمرنا
نم يا عزيزى دون ارق
ما طالما دائم حضورك فينا
مادام الامد
نم يا رسول الحب
يا بعض الزمن
نم ياوطن

تقديم


حينما ينشطر الحزن الى نصفين  يتخزهما الحب قدمان
يتكأ عليهما كاما ارهقه الحنين
وانهكه الغياب
واضناهو الانتظار

نص

وعلى العموم انا بشكرك
يا زولة يا رايعه وكفاك
يا مزهلة
انا بشبهك فى كل شى
خلينى فيك اتاملك
يا حاضرة فى الزمن الغياب
يا مرهفة
أنا بفقدك فى كل مدارات الفصول
يا واضحة رقما للافول
يا صابرة غصبا للكفاف
يا طاهرة عنوانك عفاف
يا مدهشة
وانا ابتدرتك لمل انتهت المواكب من ضجيجا اتمهلت
واسرعت بيك شايل خطاى
اتسمرت
اتحركت
دارت عكس دورة دماى
صمت العرق
سهت البلازما الفى الوريد
واتوقف القلب البريد
يا زولة احساسك نبيك
انا بشتهيك
لحظة تداخل الازمنة
وفرط التواصل والحنين
وضيق اتساعك اشتباه
وسر انشغالك انتباه
وطعم ابتسامك انشداه
واتحسسك قيمتين وضل
لونين خزاز
وصوت اعتزاز
وانا بستبيح سر اهتمامك بالغموض
وطعم الخفوت
والضجة والصوت البان ويمرق سكات
يا زولة فات
كل التضارب فى المواعيد القديمه الانحسار
الوجعة والحس الحزين
ورهق المشاوير البعاد
بصبح رفات
الصفقة الغنوات الدبكة
سهر العيون ببقى انحطاط
الونسة والليل الببيت فوق العيون
وعسل الكلام والاحترام
ببقى انهزام
كل المناخات والفصول
كل الطقوس اتغيرت
الضحكة تديك احتمال انك حزين
والحزن بدخل فى العيون احساس نعاس
وهمس الليالى السر بصير اكبر نواح
واتغيرت
كل التضاريس والبيوت
تصبح خيوط
والزكرة تنهش فى القلب
والاحتمال
الصمت اخطار للهطول
او اكتمال للوحة والحزن الوشيك
كل التمازج انفصام
او انفصال بين الولوج فى الريشة
واللون الخيال
واتغيرت
حتى الكضب بلبس قناع كبد الحقيقة
والحقوق الضايعة تايهة بلا عدل صابا ابتزال
وعلى كل حال
انا مدمنك
بتقريفك
خلينى بقدر بحدد لون عينيك
بعرف غناك
يا زولة كلك احتفال وانا كلى عيد
ويتمزق التاريخ على جسدك قصيد
يا مستفانى حضور وريد
استحلفك ........
استلطفك................
خلينى فيك
يازولة كلك انسجام
وافترضى انك امتدادات الغمام
وانى التزام
وما منك الصوت النشاز
وانك ما من الحس البحرض فى النفوس
اسف الكلام
البستفزفى كل حشاشت القلوب الانهزام
وانك قوافل ريد وحب
حزمة ادب
زوق واحترام
وانك تمام
وعلى الدوام
انا والغرام
وباقى الكلام بنودعك


موسى يعقوب محمد



عش للقصيد

وتحترق الشموع
وقالت نسوة
اعتراف
نشاز في همس السحر
سافرت فيك

سافرت فيك
وتحترق الشموع
اعتراف
وقالت نسوة
نشاز في همس السحر